Galkacyo,(buhodlepost)- Ergo nabadeed oo uu horkacayo Maxamed Cali Yuusuf (Gaagaab) ayaa maanta ah la filayaa in ay ka baxaan magaalada Gaalkacyo.
Si ay u kala dhex galaan laba beelood oo ku dirirsan deegaanka Cagaare.
Maxamed Cali Yuusuf (Gaagaab) ayaa waxa uu warbaahinta u sheegay tegitaankiisa ku aadan Cagaare,
waxaa uuna sheegay in ergo odayaal u badan oo uu horkacayo ay ku baxayaan maanta deminta
colaada ka soo cusboonaatey dhulka hawdka ah.
Gaagaab ayaa baaq nabadeed u diray labada beelood ee ku dirirsan deegaanka Cagaare, waxaa uuna
sheegay in uusan dagaal faa’ido laheyn oo ay ka fiican tahay in nabad lagu wada noolaado.
Odayaasha beelaha ay ka soo jeedaan reer guuraaga diriraya ayuu Gaagaab ugu baaqey in ay ka qeyb
qaataan kala dhexgalida labadaasi maleeshiyo beeleed ee hawdka ku dagaalamaya isaga oo sheegay in
uu ka qeyb geli doono heshiisyada lagu dhex dhexaadinayo labadaasi beelood.
” Ma aha in la fiirsado laba beelood ee reer Puntland ah dirirtood, waa in la kala dhexgalaa loo sheegaa
dantooda, waa in aan geed gaaban iyo mid dheer u fuulnaa sidii loo dhameyn lahaa oo aysan mar
dambe isugu soo laaban colaad dambe labada beelood” ayuu intaa raaciyey Maxamed Cali Yuusuf.